Hamshiralik ishi
KASBI HAQIDA BATAFSIL MA`LUMOT

Yo'nalish Kodi	5510700
Kasbiy mutaxassisliklar	Davolash ishi feldsheri, tibbiyot hamshirasi.
Ixtisosliklar	O‘rta maxsus (umumiy amaliyot feldsheri, umumiy amaliyot hamshirasi, funksional tashxislash tibbiyot hamshirasi) – tibbiyot kollejlari; Oliy (vrach, oliy hamshira) – tibbiyot institutlari va akademiyalari.
Qobiliyatlar	diqqat, ohistalik, yuqori mas’uliyat, kuzatuvchanlik, mustahkam xotira, mantiqiy aql, tibbiyot preparatlariga nisbatan allergiyaning bo‘lmasligi, turli yoshdagi insonlar bilan to‘g‘ri muomalada bo‘la olish, suhbatdoshni tinglay olish.
Fanlar	biologiya, kimyo, fizika, ona tili va adabiyot, informatika, chet tili, jismoniy tarbiya, estetika, psixologiya.
Mazmuni	Davlat yoki xususiy klinikalarda – bemorlarni qabul qilish, anamnez qo‘yish, suhbat va kuzatuv jarayonida tashxis qo‘yish, qo‘shimcha davolash tadbirlarini (muolajalarni) olib borish, davolanish kursini belgilash; bemorlarni o‘z chaqiruviga binoan xonadonlarida ko‘zdan kechirish, konsilium, majlislarda ishtirok etish; feldsher va hamshira uchun – bemorni ko‘zdan kechirish, retseptlarni tuzish jarayonlarida vrachga yordam berish, vrach topshirig‘iga asosan davolash muolajalarini olib borish; Statsionarda – bo‘limda navbatchilik qilish, og‘ir kasallarga tez yordam ko‘rsatish, bemorlarni ko‘zdan kechirish va ularga tashxis qo‘yish, davolash jarayonini nazorat qilish, bemorlarning tibbiy kartalarini to‘ldirish, konsilium, majlislarda ishtirok etish, patsientlarning qarindoshlari bilan suhbatlashish; feldsher yoki hamshira uchun – vrach topshirig‘iga binoan davolash tadbirlarini olib borish, bemorlarni qabul qilish va operatsiya jarayonlarida vrachga yordam berish; Tez yordam tizimida – navbatchilik qilish, shoshilinch chaqiruvlar, jabrlanuvchi va bemorning qarindoshlari yoki noxush hodisa guvohlari bilan suhbat olib borish, ko‘ngilsiz voqea joyining o‘zidayoq operatsiyalarni olib borish, bemorni, uning hayoti xavfsizligini ta’minlagan holda, statsionarga etkazish, tibbiy kartalarni to‘ldirish; Bolalar ta’lim-tarbiya muassasalarida – bolalarni rejalashtirilgan ko‘rikdan o‘tkazish, bemorlarni aniqlash, muassasaning sanitar holatini nazorat qilish, tegishli hisobotlarni tayyorlash, tibbiy kartalarni yuritish, tuman epidemiologik tashkilotlari va sog‘likni saqlash organlari nazoratchilari, tarbiyachilar, ota-onalar bilan suhbatlar olib borish.
Afzalliklar	ezgu ish, insonlarga yordam ko‘rsatish; kasbning jamiyatdagi yuqori nufuzi; yillar davomida ko‘p insonlar bilan tanishuv; davolashning yangicha usullarini ishlab chiqish va ularni rivojlantirish; ilmiy kareraga erishish; o‘z shaxsiy klinikasini ochish imkoniyati mavjudligi.
Kasbiy qiyinchiliklar	jismonan, aqlan, ayniqsa bemorni qutqarib qolishning imkoni bo‘lmaganda, ruhan qiyin ish; bemorlarning sog‘ligi va hayoti mas’uliyati; tibbiy xodimning xavfli, yuqumli infeksiya oqibatida kasallanib qolish ehtimoli; ko‘plab hollarda ish grafigi me’yorsiz ekanligi uchun oilaviy hayot qiyinlashadi; muntazam ravishda malaka oshirib borish majburiyati; o‘ta yuqori kasbiy mas’uliyat.
Batafsil ma`lumot	“Ming xil kasallik bor, ammo sog‘lik bittaginadir”. (L.Berne) Hamshira – ixtiyoriy vrachning sodiq yordamchisi. Hamshiralarda tashxis qo‘yish, davolash kursini belgilash va retsept yozib berish vakolati yo‘q. Biroq, bu – hamshiralar nisbatan keng tarqalgan kasalliklarni davolash usullarini bilishmaydi, degani emas. Hamshira ukollarni mohirlik bilan o‘tkazadi, davolash va tashxis qo‘yish apparaturasini ishga tushiradi, qon bosimini o‘lchaydi va hokazo. Umuman, davolash jarayonida zarur bo‘ladigan tibbiy texnikalarni ishga tayyorlaydi, laboratoriya tahlillarini o‘tkazadi. Patronaj hamshiralar, oilaviy poliklinika hamshiralari o‘zlariga berkitilgan hududddagi bemorlar, ayollar, bolalar va keksalar ahvolidan xabar olib, zarur bo‘lganda, vrach ko‘rsatmasiga ko‘ra, tibbiy muolajalarni olib borishadi. Bugun tibbiyot oliy o‘quv yurtlarida oliy hamshiralik ishi bo‘yicha ham mutaxassislar tayyorlanmoqda. “Menejer” malakasi bilan “hamshira ishi” mutaxassisligiga ega bo‘lgan tibbiyot o‘quv yurtlari bitiruvchilari o‘z darajasida boshqaruvni tashkillashtirishi mumkin. O‘zingizni shifokorlar qatoridan joy egallashga loyiq deb hisoblaysizmi? Qo‘lingizdan kelishiga ishonchingiz komilmi? Anatomiyani yoqtirasizmi? Qondan qo‘rqmaysizmi? U holda bitta o‘ringa olti-etti va hattoki undan ham ko‘proq kishi da’vogarlik qiladigan tibbiyot o‘quv yurtlariga o‘qishga kirishga tayyorlanishni boshlang.