Radioelektronika jihozlari vatizimlari
KASBI HAQIDA BATAFSIL MA`LUMOT



Yo'nalish Kodi		 5311100

Kasbiy mutaxassisliklar		Radioelektron apparaturalarini montaj qilish, sozlash va ta'mirlash bo'yicha texnik, uchishning erdagi radiotexnik ta'minlash vositalari operatori.

Ixtisosliklar
  • O‘rta maxsus (radioelektron apparaturalari va asboblarini ta’mirlash va sozlash bo‘yicha texnik; radioelektron tizimlar montajchi texnigi; uchishning erdagi radiotexnik ta’minlash vositalari operatori) – aloqa va politexnika, gidrometeorologiya kollejlari.
  • Oliy (radiotexnik, muhandis-radiotexnik, muhandis-operator, aerolog) – axborot texnologiyalari universitetlari, aloqa va texnika oliy o‘quv yurtlari.

Qobiliyatlar		mantiqiy fikrlash, texnika bilan ishlashga qiziqish, diqqatlilik, yaxshi ko‘rish qobiliyati va xotirasi, chidamlilik, chiziqli va burchak o‘lchamlarni aniq o‘lchay olish, uzoq vaqt esda saqlash qobiliyati.

Fanlar		fizika, matematika, elektronika, elektrotexnika, chizmachilik, informatika, ona tili, chet tili.

Mazmuni
  • Radio-, aerologik stansiyalarda – apparaturalarni ta’mirlash, texnik xizmat ko‘rsatish, montaj qilish, kompyuter tizimlariga texnik xizmat ko‘rsatish; uchishning erdagi radiotexnik vositalariga operatorlik qilish;
  • Ilmiy tekshirish institutlarida – radioelektron qurilmalar va tizimlarni loyihalashtirish, ularga texnik o‘zgartishlar kiritish, takomillashgan radioelektron apparaturalarni loyihalashtirish;
  • Ishlab chiqarishda – radioelektron apparaturalarni ishlab chiqarish jarayonida ishtirok etish, mahsulotni texnik jihatdan nazorat qilish, ishlab chiqarish jarayonida foydalaniladigan elektron qurilmalarga texnik xizmat ko‘rsatish va ta’mirlash, tashkilotdagi elektron qurilmalarni boshqarish.

    • Afzalliklar    		ishning ijodiy xarakteri; texnik jarayonlarning ishtirokchisiga va ixtirolar muallifiga aylanish; maishiy xizmat yo‘nalishida o‘z shaxsiy biznesini yo‘lga qo‘yish.

    Kasbiy qiyinchiliklar    		ishning ko‘p qunt va zehn talab qilishi; aqliy zo‘riqish; stressli holatlar va avrallarga ega bo‘lgan ishning me’yorlanmagan xarakteri.

    Batafsil ma`lumot    		Radioelektronika - radiotexnika va elektronikadan rivojlanib chiqqan bilim tarmog‘i. Radiotexnika esa elektromagnit tebranishlar va radioto‘lqinlar haqidagi fan yoki amaliy ishlarda radioto‘lqinlarning qo‘llanish texnikasi.
    Radioelektron apparaturalar texnigi bir vaqtda, ham texnik, ham tashxischi bo‘la olishi kerak. Ular - apparatlar yoki tizimlardagi nosozliklar va ularning sabablarini aniqlab, bartaraf etishning operativ yo‘llarini topish; nuqsonlarni tuzatish; ishdan chiqqan detallarni almashtirish; ta’mirlash, qalaylash, elimlash va boshqa texnik xizmatlarni amalga oshiradigan mutaxassislar. SHuningdek, qo‘lda juda ham mayda operatsiyalarni tezkorlik bilan bajara olishlari zarur.
    Uchish jarayonining muvaffaqiyatli bo‘lishi, birinchi navbatda, erdagi radiotexnik ta’minlash vositalarining texnik holatiga bog‘liq. Texnik sozlik esa soha mutaxasislaridan mahorat, bilim va mas’uliyat talab qiladi, shuningdek, ular uchishning radiotexnik ta’minoti uchun ham mas’ul bo‘lishadi. Radiotexniklar aerologik va radiolokatsion stansiyalarda ham faoliyat olib borishadi.
    Radioto‘lqinlar yordamida turli ob’ektlarni axtarib topish va ularning o‘rnini aniqlash radiolokatsiya deyiladi. Bu nurlantirilgan ob’ektlardan radioto‘lqinlarning qaytish hodisasiga asoslangan. Ob’ektdan qaytgan to‘lqinlarni, signallarni radiolokatorlar qabul qilib oladi.
    Radiolokatsiya aviatsiyada, flot va komonavtika, harbiy sohada keng qo‘llaniladi. Radiolokatsion qurilmalar har qanday ob-havo sharoitida (hatto ko‘rinish mutlaqo bo‘lmaganda) ham, sutkaning har qanday vaqtida suv va havo kemalari harakatining xavfsiz bo‘lishini ta’minlaydi. Radiolokatsiya yordamida ularning bir-biri yoki boshqa harakatlanuvchi va qo‘zg‘almas ob’ektlar bilan to‘qnashuvining oldi olinadi. Radiolokatsion stansiyalar havodagi holatni uzoqdan turib kuzata oladigan doiraviy ko‘rish imkoniyatiga ega. Astronomik tekshirishlarda, planetalar va boshqa osmon jismlarigacha bo‘lgan masofalarni o‘lchashda ham radiolokatsiyaga asoslaniladi.
    Bir so‘z bilan aytganda, radiolokatsion stansiyalarda uchish xavfsizligi ta’minlanadi.
    Radioelektronika bo‘yicha texnik fizika va radioelektronika, radiotexnika, radiolokatsiya asoslari; apparaturalar bilan ishlay olish, ularning tuzilishi va ishlash prinsiplarini; aerologik kuzatish tizimini; rejali va tezkor usulda aerologik ma’lumotlarni to‘plash va ularga ishlov berishni; atmosferada ro‘y beradigan hodisalar va jarayonlar o‘rtasidagi o‘zaro bog‘liqlikni; axborot tizimlari bilan ishlash usullarini; mehnat muhofazasi texnika xavfsizligi qoidalarini bilishi muhim.