Tashishni tashkil etish va transport logistikasi
KASBI HAQIDA BATAFSIL MA`LUMOT




Yo'nalish Kodi
5620100

Kasbiy mutaxassisliklar
Transportlarda tashish va boshqarishni tashkil etish (avtomobil transporti)texnigi, temir yo'l sohasida mijozlarga xizmat ko'rsatish bo'yicha texnik, ko'tarma transport yo'l qurilishi mashina va mexanizmlarini ishlatish va ta'mirlash bo'yicha texnik-mexanik, daryo floti kemalarini ishlatish texnik-mexanigi.

Ixtisosliklar
  • O‘rta maxsus (avtomobilda yo‘lovchi va yuk tashishni tashkil etish bo‘yicha texnik, avtomobil transporti dispetcheri, avtojamlanma texnigi, logistik markazning texnik-operatori, yo‘l hujjatlarini realizatsiya qilish bo‘yicha agent, tovar-yuk kassiri, tashish bo‘yicha ekspeditor, ko‘tarma transport yo‘l qurilishi mashina va mexanizmlarini ishlatish va ta’mirlash bo‘yicha texnik-mexanik, mashinist, daryo floti kemalari jihozlariga xizmat ko‘rsatish va ta’mirlash mexanigi, shpiker, kema haydovchisi, elektromexanik, gidrotexnik (bagermaster)).
  • Oliy (tashishni tashkil etish va transport logistikasi; harakat xavfsizligi va uni tashkil etish; havodagi harakatni boshqarish va aeronavigatsiya) – avtomobil va yo‘llar, temir yo‘llar muhandisligi, avatsiya institutlari, texnika oliy o‘quv yurtlari.

    Qobiliyatlar
    tashkilotchilik, bajaruvchilik xususiyatlari, rivojlangan fikrlash, sabr, idrok, texnik ijodiy fikrlash, mantiqiy va matematik qobiliyatlar, kelishuvchanlik.

    Fanlar
    fizika, matematika, ona tili, chet tillari, geografiya, iqtisodiy bilim asoslari, informatika va axborot texnologiyalari, radiotexnika, elektrotexnika, radioelektronika, texnika xavfsizligi qoidalari, psixologiya, “Texnik ijodkorlik” to‘garagidagi mashg‘ulotlar.

    Mazmuni
  • Jamoat transportlari tashkilotlari yoki turli xildagi tashkilotlarning transport - ekspeditsion bo‘limlarida – yo‘lovchilardan yo‘lkirani yig‘ib olgan holda, belgilangan yo‘nalish bo‘yicha mashinani boshqarish, chakana savdoga oid turli xildagi tovarlarni manzilga etkazish, uzoq masofalarga yukni etkazish va ularni omborlarga tarqatish, foydalanilayotgan mashinani vaqti-vaqti bilan ta’mirlab, uni tozalab turish, ishga yaroqsiz holga kelib qolgan qismlarini almashtirib turish;
  • Logistik markazlarda - tashish uchun eng ma’qul transport vositasi va marshrutni tanlash, transport kompaniyalari bilan shartnomalar tuzish, omborxonalarni arendaga olish, yuklarni bojxona orqali rasmiylashtirish va yo‘l davomida ularni kuzatib borish, tashkilotning yuk va yo‘lovchi tashish (ish joyiga qarab) rejasining bajarilishini ta’minlash.

  • Afzalliklar
    ish va ish haqining turg‘unligi; nisbatan yuqori ish haqi; texnik va haydovchilarga bo‘lgan yuqori ehtiyoj; yaxshi foyda olish imkoniyati; shaxsiy biznesni tashkil qilishning osonligi.

    Kasbiy qiyinchiliklar
    ishning smenali tartibi; asabiy va jismoniy zo‘riqish; stressli holatlarning kelib chiqishi; mijozlarning ishonchsizlik bildirish xavfi; texnika xavfsizligi va mehnat muhofazasi qoidalariga qat’iy rioya qilish; avtohalokatga uchrash xavfi; juda uzoq vaqt bir xil holatda turish; me’yorlanmagan ish kuni; DAN xodimlari va boshqa haydovchilar bilan kelib chiqadigan kelishmovchiliklar; biznesdagi hamkasblar bilan yuqori raqobat.

    Batafsil ma`lumot
    Transportlarda tashish va boshqarishni tashkil etish texnigini, mohiyatiga ko‘ra, logistika bo‘yicha mutaxassis deyish mumkin.
    Logistika – transport va boshqa resurslar harakatini rejalashtirish va nazorat qilish faoliyati. Oddiy qilib aytadigan bo‘lsak, logistik xizmat – “eshikdan eshikkacha” eltib berishni tashkil qilish.
    Transportlarda tashishni tashkil etuvchi mutaxassisning asosiy vazifasi – tovar (yuk) yoki transport vositalarining yo‘lda yoki saqlash joylarida turib qolish vaqtini hamda tashish xarajatlarini eng kam qiymatga tushirish.
    Mutaxassisning majburiyatlariga eng ma’qul transport vositasi va yo‘nalishni tanlash (avto-, avia-, suv, temir yo‘l); transport kompaniyalari bilan shartnomalar tuzish; omborxonalarni arendaga olish; yuklarni bojxona orqali rasmiylashtirish va yo‘l davomida ularni kuzatib borish kiradi. Ular transport harakati grafigiga qat’iy rioya etishlari lozim. Xuddi shunday, soha egalari transport turlari bo‘yicha tashishni tashkil etishda bevosita ishtirok etish, yuk va yo‘lovchi tashish(ish joyiga qarab) rejasining bajarilishini ta’minlash, transport vositalariga texnik xizmat ko‘rsatish, avtotransport korxonalarining bo‘limlarini zarur yoqilg‘i va moylash vositalari, detal va jihozlar bilan ta’minlanishini nazorat qilish, dispetcher xizmati operatorlarining ishiga rahbarlik qilish, yo‘l varaqalarining rasmiylashtirilishini tekshirish, transport vositalarining texnik holatini baholash va nosozlik sabablarini aniqlash, ta’mirlash ishlarining o‘z vaqtida amalga oshirilishini nazorat qilish, liniyadagi avtomobil haydovchilariga texnik yordam tashkil etish, foydalaniladigan materiallarning sarflanish me’yorini nazoratga olish, tashish jarayoniga oid hisob-kitoblarni yuritish ishlarini bajarishadi.
    Kasb – juda ham qiziqarli va shijoatli, ayniqsa, o‘g‘il bolalar orzu qilganidek. YAna bir yaxshi tomoni – eng zamonaviy transport vositalarida mamlakat va dunyo bo‘ylab yuk va yo‘lovchilarni manzillarga etkazish maqsadida sarguzashtli sayohatlar zavqini surish. Xo‘sh, siz ana shunday kasbning egasiga aylanishni istaysizmi? Agar shunday bo‘lsa, mos o‘quv yurtini tanlang va quyidagi bilimlarni o‘zlashtirishni boshlang: transport-ekspeditsiya faoliyati va logistika asoslari, tashish jarayonining axborot ta’minoti va texnologiyasi, metrologiya, standartlashtirish va sertifikatlash asoslari, O‘zbekiston transport tizimi, yo‘l harakati qoidalari, harakat xavfsizligi, avtomobillarni boshqarish texnikasi, ularning tuzilishi, ish prinsipi, texnik xizmat ko‘rsatish va ta’mirlash, avtomobillar diagnostikasi, iqtisodiyot asoslari, texnika xavfsizligi va mehnat muhofazasi qoidalari.
    Avtokolonna, avtoparklar, transport ekspeditsiya kompaniyalari, transport agentliklari, taksi parklarida, albatta, o‘z o‘rningizni topasiz degan umiddamiz.
    Yo‘lingiz ravon va bexatar bo‘lsin.